3.10.2018 |
Lesiringurin farin í gongd
Mánakvøldið hittust næmingarnir í nýggja lesiringinum fyri fyrstu ferð
Bókavørðurin, Oddmar Ravnsfjall, hevði sett okkurt gott fram, tá ið 8 næmingar møttu fyrstu ferð til lesiring á bókasavninum.
Næmingur í 10.flokki kom við hugskotinum um at hava lesiring, og hetta fór bókavørðurin beinavegin í gongd við at fyriskipa.
Lesiringurin er fyri allar næmingar í 6.-10.flokki. Um onkur afturat er áhugaður í at vera við, kunnu tey seta seg í samband við Oddmar Ravnsfjall.
Ætlanin er, at næmingarnir hvønn mánað lesa somu bók. Síðani hittast tey heima, ella á skúlanum, at práta um bókina.
Hóast at fleiri høvdu lisið hana áður, avtalaðu næmingarnir, at fyrsta bókin skuldi vera Harry Potter 1.
Tá næmingarnir møtast aftur síðst í oktobur, verður ein nýggj bók vald.
Vit vóna, at foreldur royna at skumpa undir, at teirra barn kemur við til lesiringin.